Home » Ministries » National Mission » Leadership For Mission » Policy Paper (Niuean Version)

TAKITAKI FEKAFEKAU

Folafolaaga (Introduction)

Na uiina he Atua e lotu (church) ke fekafekau ke he haana tau gahua he lalolagi. Mai he uiinaaga ia, iloa ai he lotu na fai kakano aoga e fekafekauaga he takitaki, mo e maeke foki he haana moui takitaki ke atagia mai ai e aga faka-mahani lotu.

Tali mai he hoko atu e Tala Mitaki ke he Pasifika, ko e tau lotu kehekehe ha ne fakamatafeiga e moui ha i loto he Tohi Tapu ke he tau tagata, ke fekafekau ma e Atua. Ko e peehiaga he fakamalolo na, fakave ke he fakamatalaaga he Kupu Tohi Tapu mo e tau Sakalameta Tapu, ko e tau uho fekau ke he moui he akoako kua talia e moui foou ha ia Keriso. Maeke agataha e akoako ke he talahauaga ia ke feaki ke he puhala he fakakite, takitaki, fakahoahoa mo e laveaki e fakafetuiaga ke he mahani lotu.

Ko e tau vaha he seneturi uafulu tokologa e tau tagata mai he Pasifika ne omai ki Niu Silani mo e tamai mo lautolu ha lautolu a tau aga tapuaki mo e tau mahani tupuna motu. (Ko lautolu kua fakamakamaka ke he taofiaga mitaki ha he lotu mo e mailogaaga he Faifeau/Akoako, kua fakamau ke he moui tuga he nonofo he tau motu he Pasifika.) Fakatutu ai e tau ekalesia po ke tau lotu mo e mailoga fakalahi e fekafekau ke he Atua ke he motu nai. Tali mai he tau 1969 ko e tau fakapotopotoaga tagata Pasifika ke he Lotu LMS he iloa e tautolu poke faka-Peletania Congregational Union, kua matutaki atu mo e lotu Polesepateliane ke he fakamooliaga fakave ke he maamaaga faka-tutaki tuga e tau tutaki a Iesu.

Nakai la leva lahi e manamanatu mo e fakakite he Lotu Polesepateliane taha talahauaga ko e 'takitaki fekafekau' ke lagomatai aki e maamagaaga hagaao ke he takitaki fekafekau ma e Atua ke he lalolagi ainei. Ko e fakamaamaaga na i luga ke lagomatai aki e kakano he talahauaga 'takitaki fekafekau', mo e lagomatai aki foki e fifiliaga he tau takitaki kua ha ha i ai e hokulo he manamanatuaga ke aoga e fifili kaeke kua fifili mo takitaki.

Na loga foki e tau talahauaga hagaao ke he 'takitaki fekafekau' ke he iloaaga he tokologa he tau tagata. Pete ia, ha ha i ai agaia ni e kehe kehe he tau kakano ne toka ai. Ka talahau fakalaulahi, ko e 'fekafekau' (servant) hagaao ke he puhala takitaki ka ko e 'gahua' (mission) hagaao ke he puhala ke fakaholo aki he fekafekau haana takitakiaga. Fakakatoatoa ai pehe e talahauaga ia, ko e 'takitaki fekafekau' fakatonu ke he onoonoaga ki mua, fekafekau mo e mahani tonu, mahani molu, mo e aga fakatokolalo.

Kitiaaga Mamao (Vision)

Fakamua ke iloa, nakai ko e 'takitaki fekafekau' ke fekefekau ke he tau tagata ha he fakapotopotoaga po ke matakau lotu Polesepateliane a Niu Silani. Ka ko e fekafekau ke he gahua he Atua fakalataha mo e falu he tau tagata kua fia fekafekau ke he kitiaaga ia.
Ko e kitiaaga na foki ke fakailoa ke he tau fakapotopotoaga lotu mo e ha lautolu a tau fakatokatokaaga ha ko e onoonoaga mamao ki mua. Haana kakano ko e moui ka katoatoa ke he fakapukeaga he tua ha ia Iesu Keriso mo e tau mena mitaki oti he lalolagi tufugatia he Atua, to gahuahua ha ko e fakamaloloaga he Agaaga Tapu, ke fakalaulahi aki e moui taki fekafekau tuga kua talahau he Lotu Polesepateliane a Niu Silani.

Kitiaaga Mamao (The Vision Includes)

• Ko e hokulo he pulotu tagata ke talahau e kehe kehe hagaao ke he tau mena he Atua mo e tau mena fakalalolagi
• Ko e hokulo he fakalaulahiaga he tau puhala fefakailoaaki he tau fekau mo e fai kakano ke he vaha nei
• Fakalilifu e tau aga tupuna motu mo e mailoga ke he agaaga fakamakamaka e fia matutaki mo e lotu ke he tau aho ha ha i mua
• Makaka ke he agaaga fakamooli ka e nakai ko e fia kitia fakatagata
• Taufetului mo e nakai mahala kaeke kua hagahaga kelea e fakafanoaga he tau fekau

Fakamooli (Accountability)

Ko e 'takitaki fekafekau' muitua ke he moui tuga ha Keriso. Ko e mouaaga haia he fakakiteaga:

• Kua tonu e fakaaogaaga he malolo kua foaki ka e nakai fakatokoluga po ke mahani fakahanoa
• Ko e puhala fakaalofa kua tonuhia ke he malolo ka e nakai fakatupatupa e tau tagata
• Ke fakatupu e fakafeilo, manako ke o tatai mo e tau tagata e tau fakaholoaga ka e nakai fakatamala, mo e fakamakai ke fakailoa e tau mena tonu
• Ko lautolu ne lolelole ke he moui tua ke muitua e takitakiaga fakamooli ke moua ai e kautu
• Ke he mahani gahua mo e tapiki ke he tau fakaakoaga he lotu ka e nakai ko e tau puhala faka-tagata ti koenaia
• Ke fakatumau e fakaako ke he agaaga fakamakutu ke tumau kumikumi
• Ke taofi e mahani he fakafekau mahani foaki ma e gahua

Mahani (Character)

Na fakamalolo he Aposetolo ko Paulo e tau tagata lotu i Filipi ke he tau kupu nai: "Kia toka foki ia mutolu e manatu ia ne toka ai ia Keriso Iesu" (Filipi 2:5). Fakakite ai e ia kua lata ke mahani fakatokolalo, mahani tonu, moui ke he moui fekafekau, fakakite e mahani molu, mo e omaoma ke he tau fekau he Atua ha ko e taha vala ia he tau mahani a Iesu.

Nakai ko e takitaki fekafekau ko e manamanatuaga pulotu ti koenaia, pete kua tu tonuhia ke pihia. Ka e ha ha i ai kua lata ke mahani hako ke atagia mai ai e agaaga totonu. Fakakite ke he kitiaaga nai e moui tua fakave ke he takitakiaga he moui fekafekau tapiki ke he liogi tuga he fakaako e Iesu, ke fakatolomaki mo e fakalaulahi e hokulo he manamanatuaga ha he fakamaloloaga ke lata mo e moui takitaki fekafekau.

Fagavahega (Variety)

Ko e Akoako gahua ke he levekiaga he Kupu Tohi Tapu mo e tau Sakalameta Tapu ke he Ekalesia (parish) ne fa talahau pehe ko lautolu ne hahamo e fakafanoaga he tau fekau oti, ha he takitakiaga ke he lotu. Peehi malolo e talahauaga nai ke he faka-kehekeheaga he kitia he tau tagata nakai fakauku mo e ha lautolu e tau fekafekau fakauku (clergy). Pete ia, na talahau mai he Tohi Tapu ke he kupu Heleni ne pehe 'laos' ko e tau tagata oti ko e tau tagata he Atua, mo e nakai fai veveheaga kua fakavahega aki e tau tagata. Ti ko e tau fekafekau fakauku ko lautolu ko e taha vala he talahauaga na i luga - nakai fakavahega e tau tagata ke he tufugtiaaga ha tautolu. Nakai kitia ai ke he kitiaaga he Maveheaga Foou kua fakakehekehe e tau tagata.

Ko e lotu Polesepateliane a Niu Silani nakai fakakehekehe e tau fekafekau fakauku mai ia lutou ne nakai fakauku (lay people), po ko lautolu e tau ulumotua / tiakono. Na foaki faka-fakaalofa mai e tau taleni he takitaki ke takitaki e tau matakau tuga he tau fuata (youth), tau mamatua fifine (APW), mo lautou ne takitaki e tau fakafetuiaga kumikumi Tohi Tapu ke he tau kaina (home groups).

Ko lautolu e tau takitaki oti he lotu ko e tau takitaki tuga ni he tau fakapotopotoaga tagata ke he tau maaga ne nonofo ai a tautolu ke he motu nei ko Niu Sialni. Nakai talahau e Maveheaga Foou he Tohi Tapu fakamahino ni ke he lotu ti koenaia, ka e fakalaulahi mo e putoia ai foki e tau fakafetuiaga tagata tokologa ha ha he lalolagi. Na igatia foki e tagata mo e haana ni a ui, fakahagaao ke he tau taleni foaki mai he Atua. Fakamatala ai he tagata e Kupu he Atua mai he Tohi Tapu, mo e talia e tau Sakalameta Tapu, ke puipui aki e hokulo he Tala Mitaki ha ko e mailogaaga haana ko e takitaki fekafekau.

Fakakatoatoaaga

Pete he kehe kehe e tau maamaaga hagaao ke he alito he 'takitaki fekafekau' mo e falu he tau fakaakoaga kua fakaako aki e kakano uho ha ha i ai, ko e katoatoa ha ha he tagata:

• Fakakite he takitaki fekafekau e fakafoouaga he gahua kitia mamao a Iesu Keriso
• Hagahaga mitaki e kitiaaga he takitaki fekafekau mo e matutakiaga ke he Tala Mitaki
• Atagia mai he takitaki fekafekau e moui tua mauokafua
• Maeke he ha tagata he tau tagata he tau matakau lotu a Niu Silani ke fakakite e fakaholoaga gahua he takitaki fekafekau ke he loga he tau puhala

 

Key Questions on Leadership for Mission