Ta'ita'iga mo le Galuega - Auauna a le Atua

Ua valaauina e le Atua lana Ekalesia e au faatasi ma Ia i lana Galuega i le lalolagi.

Ua loa ona silafia e le Ekalesia e moomia se ta'ita'iga lelei, mo le manuia ma le olaola lelei o le Galuega a le Atua. I le ma lea, o so'o se ta'ita'iga lelei lava e atagia ai tu ma aga faa-kerisiano a le Ekalesia.

I le ulua'i taimi na taunuu atu ai le Tala Lelei i le atu Pasefika sa pu'eina ma fa'aosofiaina tagata i le agaga galulue i le Galuega a le Atua. Sa fa'amamafaina le soifua auauna e avea ma Faife'au poo le auauna a le Atua. O ia lea o le sui vaaia o le Atua, e atagia i lona ola le soifuaga fou ia Keriso Iesu. Ua tu ese ma tu maoti lona sao i le fa'afaileleina, faafoeina, faaolaolaina ma le ta'ita'iga o le Ekalesia ma le Lotu.

O le oo mai i Niu Sila o tagata atumotu, i le seneturi talu ai, na latou aumaia ai lava le soifuaga tapua'i ma lo latou naunau i le Galuega a le Atua, ma galulue i le Iuni a Ekalesia Faapotopotoga Kerisiano i Niu Sila. Ua avea le Lotu ma au-aiga e fa'amalosia ai a latou mafutaga soo fa'atasi ma auauna ai i le Atua. I le 1969 sa tu'ufa'atasi ai 'aulotu a tagata atumotu (PIC) sa i le Iuni a Ekalesia Faapotopotoga Kerisiano (Congregational Union) ma le Ekalesia Perepereane, ma fa'amanuiaina ai le Ekalesia Perepereane i lo latou sao i tu ma aga o auaunaga faa-le-pasefika, i le Glauega a le Atua.

I se iloiloga o le ta'ita'iga o le Galuega i le Ekalesia Perepereane, ua fa'aaogaina ai e le Ekalesia Perepereane le fa'a'upuga po'o le alaga'upu lenei o le "Ta'ita'iga fa'a-'au'auna o le Galuega" e fa'amatalaina ai le ituaiga ta'ita'iga e moomia e le Ekalesia e' 'au'auna ma tautua ai le Galuega a le Atua i nei ona po.

O se silafia lelei o lenei itu taua, o le Ta'ita'iga faa-auauna o le Galuega, o le a fesoasoani lea i le sailia o e ua molimauina se agava'a e mafai ona a'oa'oina ma fa'aolaolaina, ina ia avea ma ta'ita'i lelei e tula'i mo nei ona po.

O le a 'ese'ese le uiga o lenei alagaupu i le fa'afofogaaga a o tatou tagata, "Ta'ita'iga fa'a-'au'auna o le Galuega". A ua iai ona uiga ma'oti e fia fa'amamafaina, e mafai ona laugatasia ai finagalo. I le aoao telega o manatu, o le "Ta'ita'iga fa'a-'au'auna o le Galuega" e fa'atatau i 'ese'esega o ta'ita'iga (style), ma le manino o le autu o aga'i i ai le ta'ita'iga (direction).

E fa ni itu tetele lava e fa'amatalaina au'ili'ili ai lenei alagaupu. Muamua e fa'atatau lenei alaga'upu i le Tofa Mamao (Vision). Lona lua e faatatau i le manino o le fa'amatalaga o le soifua 'au'auna (accountability). Tolu, e fa'atatau i le soifua mautinoa i le fa'atuatua ma le fa'amoemoeina i le agaga 'au'auna ma le loto maualalo. (Character). Ma lona fa, e fa'atatau i ta'ita'iga 'ese'ese ua totofi i ai le soifua auauna o so'o se ta'ta'i (Variety) e pei o le ta'ita'iga a le Faife'au, Tiakono, Autalavou, Aoga AsoSa.

E faatatau i le Tofa Mamao

O le galuega a le Ta'ita'i, o le galue lea fa'atasi ma isi e tautua le Galuega a le Atua. E le o le tautuaina o le Lotu po'o le fa'alapotopotoga ua ta'ua o le Ekalesia Perepereane i Aotearoa NiuSila. A'o le naunau lea e feso'ota'i lelei ma isi uso a auauna i le Galuega ina ia faia le finagalo o le Atua, i lana Galuega i le lalolagi.

O le autu o le Galuega o le manino lea o le Tofa Mamao na te aumaia le vaaiga i le lumana'i o aga'i iai le Galuega. O le Tofa Mamao o le vaaiga lea i le olaga manuia o le tagata o le Atua, o lo'o ua fa'avae i le taliaina o Iesu, o lona Ali'i ma lona Fa'aola, ma ua atagia ai le soifua auauna o Iesu i lona olaga, e ala i lona fa'alagolago i le Agaga Paia lona fesoasoani sili, e ta'iala ai lona va nonofo ma uso-a-tagata, lona va nonofo ma mea uma na faia ma le foafoaga paia a le Atua, ae maise lona 'ana'ana ia Iesu ma lana Galuega lavea'i i le lalolagi. Ua le gata i lea, a ua a'afia ai lona silafia o le tulaga o le Ekalesia Perepereane ma lana sao i totonu o lenei Galuega, fa'atasi ai ma isi lala uma o le Ekalesia Kerisiano i le lalolagi.

O le Tofa Mamao e a'afia ai mea nei

o le agava'a e iloa ai le 'ese'esega o se mea mai le Atua, ma se aga fa'anei ona po.
o le agava'a e feso'ota'i ai i auala e malamalama ai le tupulaga o nei ona po
le fa'atauaina o tu ma agaifanua fa'atasi ai ma le naunau i tu ma aga i mea fou o le malo e feso'ota'i ai i tupulaga o a taeao.
o le sogasoga i mea tatau ma mea lelei, e le mataga pe faatalasua.
o le agaga fa'amalosi ma le filiga e le fiu gofie pe musua.

E fa'atatau i le Fa'amatalaga o le Soifua auauna

E silafia lelei e ta'ita'i, e ao ina tu'uina atu se fa'amatalaga mo a latou fuafuaga ma faa'iuga. E ao ina manino mea uma e uiga i mea ua fai. E fa'atauaina lenei tulaga, o se matati'a taua o le soifua auauna o so'o se ta'ita'i, le feofoofota'i o fa'amatalaga e fa'a manino ai tulaga o le ta'ita'iga o le Galuega. E le fiafia i mea fa'anunumi a e naunau i le fa'amaninoina o tulaga uma o le ta'ita'iga. Latou te silafia fo'i, a tulaga tutusa uma ta'ita'i o vaega 'ese'ese i lenei tulaga, e fa'amalosia ai le Ekalesia ma fa'amautuina atili ai le Galuega i le so'otaga manino a le au Uso uma.
O tulaga nei e tula'i mai ai pe a fa'apea ona galulue ta'ita'i:

o le a fa'atino lo latou ta'ita'iga i se Tofa loloto ma se utaga mamao.
o le a latou utagiaina ta'iala ma fa'avae o le fa'atinoga o le Galuega
o le a latou ta'utino le ola su'esu'e ma le a'oa'oina
o le a latou galulue ma se tasi e fautuaina i latou i le Galuega

E fa'atatau i le Soifua Fa'atuatua ma le Fa'amoemoeina

O le ta'ita'iga ua le na o le agava'a e fuatia i ai. Ua fuatia fo'i i le fa'amoemoeina ma le fa'atuatuaina e tagata. O lona uiga e atagia mai le soifua fa'atuatua ma le soifua tatalo e fa'avae ai le ola fa'a-ta'ita'i. E naunau e fa'apei o Iesu, ina ia fa'aosofiaina ai manatu lelei ma le ta'ita'iga lelei. Ua fa'amalosi Paulo i le Ekalesia i Filipi "Ia ia te outou fo'i lenei manatu o ia Keriso Iesu" (Filipi 2:5). Ua ia fa'amamafaina fo'i mea nei; o le loto maualalo, o le fa'amaoni, o le ola tautua, ma le usiusita'i i le Galuega ma le finagalo o le Atua, o vaega taua ia o le "manatu o ia Keriso Iesu".

O le ta'ita'iga e fa'atuatuaina, e fa'aalia mai ai nisi o itu taua nei :

o le fa'aaogaina tatau o le tofi fa'ata'ita'i e aunoa ma le so'ona fa'aalialia vale
o le fa'aaogaina tatau o le pule e aunoa ma le taofiofi mamau ua le fetala'i.
e iai se mafanafana e feofoofota'i i lana ta'ita'iga, e ma'oti ana fuafuaga ae le fevaevaea'i. naunau e fa'agaganaina leo o e le o lagona mai o latou finagalo.
e fa'amoemoeina ma fa'atuatuaina lana tausiga o se tamaoaiga ma ni fesoasoani ua fa'aagaaga mo le Galuega

E fa'atatau i le 'ese'esega o ituaiga ta'ita'iga

O le Ekalesia Perepereane e le fa'atapula'aina le ta'ita'i i faife'au ua fa'au'uina po'o tiakono. E aofia ta'ita'i uma lava o itu tino o le Ekalesia, e pei o mafutaga a Tina, Autalavou e o'o lava ia i latou o ta'ita'iina mafutaga tatalo ma mafutaga laiti fa'a-le-tusi paia i maota ma laoa.

Ua tofu le tagata ma lana 'meaalofa fa'a-le-agaga' ua aumai e le Atua, e atiina a'e ai le Ekalesia, o le Tino o Keriso. Afai ua talafeagai lou tofiga ma lau 'meaalofa fa'a-le-agaga' ua e galue e tusa o lou 'vala'auina'. Afai e leai, e te le o maua lou vala'auina. E fa'atutugata fo'i le fa'atinoina o lou tofiga. O le "ta'ita'iga" o se tasi o meaalofa fa'a-le-agaga. O le galuega fa'a-Faife'au, e aofia ai le ta'ita'iina o Sauniga lotu, le folafolaina o le fingalo o le Atua atoa ma le sakalameta o le 'Fa'amanatuga', o se tasi o vaega ma'oti o le Galuega a le Atua. A e le na pau lea. E taua uma fo'i isi vaega ma o latou ta'ita'iga. O ta'ita'i uma o itu tino 'ese'ese o le Ekalesia, e afua mai lava i le Faife'au e mana'omia e iai ma ia fa'aaogaina le meaalofa fa'a-le-agaga o le "ta'ita'iga".

Tu'ufa'atasiga

E ui ina 'ese'ese ituaiga ta'ita'iga ma 'ese'ese fo'i fa'alapotopotoga, 'ese'ese tu ma aga, e iai ni vaega tu ma'oti ua fa'aalia ai le 'a'ano o le 'ta'ita'iga'

e atagia ai le Tofa Mamao o le Galuega lavea'i a Iesu Keriso
e talafeagai lona fa'atinoga i e o ta'ita'iina ma manino lona fa'amatalaga i le Tala Lelei.
e atagia ai le soifua fa'atuatua ma le fa'amoemoeina, e fa'avae i le mafutaga felata-a'i ma Iesu
e mafai ona fa'atinoina e so'o se ta'ita'i, i ituaiga 'ta'ita'iga 'ese'ese, o e o loo galulue i le Ekalesia i Aotearoa nei.

Key Questions on Leadership for Mission