Home » Ministries » National Mission » Leadership For Mission » Policy Paper (Cook Island Maori Version)

Te Arataki no te Evangelia - Te au Tavini o te Atua.

<typohead type=3>Akatomoanga</typohead>

Te kapiki nei te Atua i te Ekalesia kia takiruru mai kia iaia, i te atatupuanga i tana Evangelia ki to teia nei ao. Kua marama ke ana oki te Ekalesia e, kia autu aia i te tutuanga i te Evangelia, ka anoano ia te Arataki meitaki, e na teia Arataki i roto i te Ekalesia e akairi pu mai te au peu o te Ekalesia.

Mei te tuatau i tae mai ei te Evangelia i te tuanga Pasifika, kua akamaroiroi te au Ekalesia i te iti tangata Pasifika kia riro ratou ei tavini i te akatupuanga i te Evangelia a te Atua. Kua akateima'a ia te angaanga tutu Evangelia ki runga i te Orometua, koia te pateriarika, koia te tiaki, e tei roto anake iaia taua oraanga ou o te Mesia. Na roto i teia mataara, rauka atura i te Orometua i te oronga mai i tana ravenga takake i te akamakaanga i te ara o te Evangelia, e pera katoa i te aratakianga, te akatanotanoanga e te utuutuanga i te Ekalesia.

I roto i te rua ngauru anereanga mataiti, e manganui ua atu te iti tangata Pasifika tei apai mai i ta ratou peu e te akonoanga enua ki Nuti Reni nei(E mea rekareka oki na ratou te Evangelia, e te ngateitei o te Orometua ei arataki, e ei akaaere ma te utuutuanga i te oraanga i te enua ou). Na roto i te au Ekalesia tei tanu ia i ko nei, kua tavini ratou i te Atua i runga i te tu o te enua nei. I te mataiti tai tauatini e iva anere e ono ngaru ma iva (1969), ko te iti tangata Pasifika mei roto mai i te Ekalesia Congregational Union, kua piri mai ratou i roto i te Akonoanga Presbyterian e kua akapuapinga atu i te reira na roto i ta ratou i marama no te tutuanga o te Evanglia e te angaanga a te au pipi.

I te au ra i topa, kua taangaanga te Akonoanga Presbyterian i te tuatua 'Te Arataki no te Evangelia - Te au tavini o te Atua' ei ravenga i te akataka i te tu o te arataki te ka riro ei tauturu i te tavinianga i te anoano o te Atua ki to te ao nei. E mea tau oki kia marama meitaki tatou e, eaa te aiteanga o te tuatua 'Te Arataki no te Evangelia - Te au tavini o te Atua'. No te mea, ei reira e rauka ei i te Ekalesia i te kite te au tangata te ka tau ei arataki. Pera katoa ka tauturu te reira ia tatou te Ekalesia, i te akarakei ma te akamatutu atu ia ratou, tei ka riro ei arataki.

E tukeke te au aiteanga ta tetai au tangata i marama no runga i teia tuatua ko 'Te Arataki no te Evangelia - Te au tavini o te Atua'. Inara, te vai nei tetai au tumu manako i roto i teia tuatua tei ka rauka ia tatou i te ariki. Me akara mamamo ia atu, te to'u tika mai nei teia ki te tu akaaereanga o te arataki e te kaveinga ta te arataki e apai nei. Me akara matatio ia ra, ko te arataki e tau, tei roto iaia te Orama, te akakiteanga (accountability), te tu tau meitaki e te iroanga (variety).

<typohead type=3>Ko Te Orama</typohead>

Ko te angaanga a te arataki, kare e ko te tavini anake ua i te iti tangata i roto i te Ekalesia, me kare, i te au putuputuanga i roto i te akonoanga Presbyterian o Aotearoa Nuti Reni. Kia angaanga ra ma tetai atu i te akatupuanga i te akakoroanga o te Atua.

Ko teia akakoroanga nei, ko te orama te ka akakite mai i te parani no te Ekalesia no te tuatau ki mua. E orama teia no te oraanga tangata e pera katoa te au mea tei anga ia ra. Kua akamau ia te orama i roto i te tuatua venereka o te Evangelia e te au akakoroanga o Iesu Mesia. Na roto i te akaprianga te orama i raro ake i te aratakianga a te Vaerua Tapu, ka rauka te urianga ma te akamaataanga atu i te turanga o the Akonoanga Presbyterian i roto i taua akakoroanga ra.

Teia te au mea o taua orama nei;

<typolist>

Ko te karape i te kite papuanga i te tuke i te au mea no te Atua e te au mea o teia nei ao.

Te karape i te kite papuanga i te au mataara tau meitaki no te akatupuanga i to te Atua anoano i teia tuatau.

Ko te akangateiteianga i te au akonoanga taito ma te akapiri ia e te inangaro maata i te apaianga mai i te Ekalesia ki te ao ou.

Te akaritoanga i te angaanga ma te pikikaa-kore.

Te tu maroiroi kare e tuku i te au no atu te ngata.

</typolist>

<typohead type=3>
Te Akakiteanga i te Tika</typohead>

Kua marama te arataki e, ka riro rai e nana e akamaramarama i te au tumu o tana au angaanga i rave, e kua rave ia te reira na roto i te au me tika. Kua marama katoa oki ratou e, ka riro te akamaramaanga atu i tetai ki tetai no runga i te au mea tei raveia, ei akamatutu i te Ekalesia ma te akamarama atu i te rurunui o tona akakoroanga. Ko teia i reira te au ua te ka rauka mai;

<typolist>

Te taangaanga anga te arataki i tona marama kia taena ia te turanga ngateitei

Te akono i te au irava no te akatereanga tau meitaki i roto i te Ekalesia

Kia akataka ia tetai tuatau tina mou no te apii i te au tuatau rava rai

Kia kimiia mai tetai tangata tau meitaki ei tiaki i te arataki

</typolist>

<typohead type=3>Ei Tu Tau Tikai</typohead>

Kare oki i te mea e, kia rauka iakoe te au ravenga o teia mea e arataki no atu e, e mea puapinga anake te reira. Inara, kia rauka i te reira tangata te tu tau tikai ma te vaerua meitaki katoa. Ei tu irinaki ia oki tona. Te apii mai nei te tuatua e, ei oraanga irinaki tikai ma te pure katoa to te arataki tei ka riro ei tauturu iaia. Ka riro katoa te reira i te akatupu mai i oranga tei aite mei te tu o te Mesia ma te toto mai i te pakari o te Mesia e te maroiroi katoa no te angaanga a te arataki. I akamaroiroi oki a Paulo i te Ekalesia i Philipi i te irava tuatua ra e, "Kia okotai rai o kotou tu ngakau e to te Mesia ra to Iesu" (Philipi 2:5). Kua akaari katoa mai aia e kia akakaka, kia tiratiratu, ei tavini oki, e kia ariki i te akaueanga no te akakoroanga e te anoano o te Atua. I te me oki e, ko tetai teia o te au tuanga o te tu o te Mesia. Ko te arataki irinaki ia e te iti tangata, ka akari mai te reira;

<typolist>

I te taangaanga anga tau tikai i te mana arataki ma te kore e rave i te kino e te takinokino atu

I te Mana o te Arataki ma te kore i te arataki akaueue

I te Au, te manono kia rauka te tika ma te kore e akatupu i te ke, e ma te anoano pakari kia riro ei vaa tuatua no te aronga kare to ratou reo i rongo ia mai.

I te tiaki meitaki i te au apinga ravarai tei rauka mai no te akakoroanga o te tutu Evangelia.

</typolist>

<typohead type=3>Ei au mea Keke atu tetai e Manganui</typohead>

Te vai nei te irinaki anga o te au Ekalesia e, na te Orometua anake ua e rave i te au angaanga arataki i roto i te Ekalesia. Kua akapakari ia teia irinakianga na roto i te akairi anga mai i te tuke i rotopu i te Orometua e te au tangata rave pure ma te au angaanga i roto i te Ekalesia. Kare oki teia akara anga i akamou ia i roto i te tuatua na te Atua pera katoa i te au akonoanga taito tei akamou ia e te Akonoanga Presbyterian.

I roto i te akonoanga Presbyterian, kare te mana arataki e vai ua ki runga i te au tangata tei akatainu ia ei Orometua me kare ei Tiakono. Ko te arataki, e taoanga oronga ia mai ki te manganui anga i roto i te putupuanga o te Ekalesia, mei te arataki o te au mapu, te aratiki o te Vaintini (APW) e te au arataki i roto i te au pupu apii buka Tapu. E maata ua atu rai te au arataki anga Keretitiano e taangaanga ia ana i roto i te au putuputuanga e pini ua ake te oire katoa. Kare oki te Koreromotu Ou i akataka mai i te tuke o te au kapikianga i rotopu i te Ekalesia e to te ao katoa nei. E kapikianga tuketuke to tatou, i na ra, tei runga te reira i to tatou au tareni tatakitai. Ko te tuanga angaanga a te au Orometua, tei riro ei tiaki ma te ako i te Evangelia, e tai anake ua ia tu arataki i roto i te Ekalesia. Te pati ia nei i reira te au arataki o te Ekalesia kia taangaanga i to ratou taoanga arataki.

 

<typohead type=3>Taopenga</typohead>

No atu oki e ka tuke te akaraanga, me kore te peu a te arataki, te vai nei rai tetai au tu pakaki i roto i te ngakau o te arataki.

<typolist>

Ka akari mai te reira i tetai orama ou i roto i te angaanga a Iesu Mesia

Ka tau meitaki te reira ma te kitea pu ua ia i roto i te evangelia.

Ka akari mai te reira i te tu pakari tei akatumu ia i runga i te irinakianga o te reira tangata.

Ka ariki ia oki tetai ua atu tangata i roto i te iroanga o te au arataki i roto i nga Ekalesia i Aotearoa Nuti Reni

</typolist>

 

Key Questions on Leadership for Mission